നാട് വളരാൻ നാടിനൊപ്പം

അതെ, വൈവിധ്യതയും വിശാലതയുമാണ് ഈ പ്രപഞ്ചത്തിന്റെ താളക്രമം. വൈരുദ്ധ്യങ്ങൾക്കിടയിലെ സമന്വയമാണ് അതിന്റെ സൗന്ദര്യം. ഇതേവിധം, വൈവിധ്യതകളെ പരിപാലിക്കുന്ന വിശാലതയും വൈരുദ്ധ്യങ്ങൾക്കിടയിലെ സമന്വയവും തന്നെയാണ് മനുഷ്യജീവിതത്തിന്റെ നന്മയും മഹിമയും. എന്തെല്ലാം തരം മനുഷ്യർ: വർണം, വംശം, ഭാഷ, ദേശം, ജാതി, മതം, സമുദായം... എല്ലാം വിഭിന്നമാണ്. പക്ഷേ, എല്ലാവർക്കും വെളിച്ചവും ഊർജ്ജവും നൽകുന്നത് ഒരേയൊരു സൂര്യനാണ്! ജീവവായു ഒരേ പ്രകൃതിയിൽ നിന്നാണ്. വെള്ളം ഒരേ മഴയിൽ നിന്നാണ്! നിലാവ് പൊഴിക്കുന്നത് ഒരേ ചന്ദ്രനും നക്ഷത്രങ്ങളുമാണ്! കാലൂന്നി നിൽക്കുന്നത് ഒരേയൊരു ഭൂമിയിലാണ്! ഒരേ പ്രപഞ്ചത്തിൽ ദൈവാനുഗ്രഹങ്ങൾ ഒരുമിച്ച് അനുഭവിച്ച്, ഒന്നിച്ച് പുലരുന്നവരാണ് നാം!

എന്നിട്ടും ദൈവം അതിരുകളില്ലാതെ സൃഷ്ടിച്ച പ്രകൃതിയിൽ മനുഷ്യൻ എന്തിനാണ് കൃത്രിമമായ അതിർവരമ്പുകൾ സൃഷ്ടിക്കുന്നത്? ഒരേ വായുവും വെള്ളവും വെളിച്ചവും ഒരുമിച്ച് അനുഭവിക്കുന്നവർ, എന്തിനാണ് ചേരിതിരിഞ്ഞ് പരസ്പരം പോരാടുന്നത്? വിഭാഗീയതയുടെ മതിലുകൾ പണിത് വേർപിരിഞ്ഞ് പോകുന്നത്? ഒരുമപ്പെരുമയിൽ വിരിയുന്ന സമാധാനവും സമൃദ്ധിയും സന്തോഷവും, പരസ്പരം ശത്രുത പ്രഖ്യാപിച്ച് നാം തകർത്തുകളയുന്നത് എന്തിനാണ്..?

വരൂ, നമുക്ക് സന്തോഷത്തോടെ ഒരുമിച്ചിരിക്കാം, സമാധാനത്തിന് വേണ്ടി ആവേശത്തോടെ പ്രയത്നിക്കാം. മതവും സമുദായവും ജാതിയും രാഷ്ട്രീയവും വേർപിരിക്കാത്ത സുകൃതങ്ങളുടെ പൊതു ഇടങ്ങൾ സൃഷ്ടിക്കാം, മനസ്സ് തുറന്ന് സംവദിക്കാം, സ്നേഹിക്കാം. നമ്മുടെ നാടിന്റെ നന്മ കാക്കാൻ, സമാധാനം സംരക്ഷിക്കാൻ, വിദ്യാഭ്യാസം വളരാൻ, കലാ-കായിക അഭിവൃദ്ധിയുണ്ടാക്കാൻ നമുക്ക് ഒരു മനസ്സായി നിലകൊള്ളാം. ഇതിനെല്ലാമുള്ള ഇടമാണ് Zest for Peace; അഥവാ സമാധാനത്തിന് വേണ്ടിയുള്ള ആവേശം.

എന്താണ് Zest for Peace, ആരാണ് ഇതിനു പിന്നിൽ, എന്താണ് ഇതിന്റെ പ്രചോദനം...? ഈ ചോദ്യങ്ങൾക്കെല്ലാം ഒറ്റ ഉത്തരമേയുള്ളൂ: മനുഷ്യനന്മ ആഗ്രഹിക്കുന്ന, ദൈവത്തിന്റെ പ്രീതി കാംക്ഷിക്കുന്ന, ഒരു പറ്റം മനുഷ്യ സ്നേഹികളുടെ കൂട്ടായ്മയാണ് Zest for Peace. പലകാരണങ്ങളാലും ഭിന്നിച്ചു കൊണ്ടിരിക്കുന്ന മനുഷ്യരെ ഒരുമിപ്പിക്കുകയാണ് Zest ന്റെ ലക്ഷ്യം. നഷ്ടപ്പെട്ടു പോകുന്ന പൊതു ഇടങ്ങൾ പുനഃസ്ഥാപിക്കുക Zest ന്റെ സ്വപ്നമാണ്. പൊതു വിദ്യാലയങ്ങൾ, കളിക്കളങ്ങൾ, ക്ലബ്ബുകൾ, വായനശാലകൾ, ചായപ്പീടികകൾ... പണ്ടുകാലത്ത് ഇവയെല്ലാം സൃഷ്ടിച്ച സാമൂഹിക നന്മകൾ നമുക്ക് തിരിച്ചുപിടിക്കണം. ഇതിന് പ്രതിജ്ഞാബദ്ധമാണ് Zest. നമ്മുടെ കുട്ടികൾ വിദ്യാഭ്യാസ രംഗത്ത് ഉന്നതിയുടെ പടവുകൾ കയറണം, നമ്മുടെ ആരോഗ്യം സുരക്ഷിതമാകണം, ഗവൺമെന്റ് തലത്തിലെ ആനുകൂല്യങ്ങൾ മുടക്കമില്ലാതെ നമുക്ക് ലഭ്യമാക്കണം... ഇതിനെല്ലാമുള്ള വിപുലമായ സംവിധാനങ്ങളുടെ സമുച്ചയമാണ് Zest.

പരസ്പരം സ്പർദ്ധയില്ലാത്ത, ആരെയും വേദനിപ്പിക്കാത്ത, മനുഷ്യരെ ഭയം ഭരിക്കാത്ത ഒരു നല്ല നാടിനു വേണ്ടി ദൈവ പ്രചോദിതമായ യത്നമാണിത്. Zest ഒരു സ്ഥാപനത്തിന്റെ പേരല്ല, ഒരു ആദർശത്തിന്റെ അടയാളവാക്യമാണ്, ഒരു ചരിത്രദൗത്യത്തിന്റെ മേൽവിലാസമാണ്. ഇവിടെ ഞങ്ങളും നിങ്ങളുമില്ല, നമ്മൾ മാത്രമേയുള്ളൂ! ഏതെങ്കിലുമൊരു സങ്കുചിത മത സാമുദായികതയോട്, കക്ഷി രാഷ്ട്രീയത്തോട് ഞങ്ങൾക്ക് യാതൊരു അഭിമുഖ്യവുമില്ല. ദൈവമല്ലാതെ മറ്റാരോടും വിധേയത്വവുമില്ല. ഈ ലോകജീവിതത്തിലെ മനുഷ്യ നന്മയും സമാധാനവും മരണാനന്തര ജീവിതത്തിലെ ദൈവ പ്രീതിയും മോക്ഷവും മാത്രമാണ് ഞങ്ങളുടെ ലക്ഷ്യം!

ഉദിച്ചുയരുന്ന സൂര്യന്റെ കിരണങ്ങളേറ്റ് തിളങ്ങുന്ന മഞ്ഞുകണങ്ങൾ! നീലിമ മാഞ്ഞ ആകാശത്തിന്റെ ഇരുട്ടിനെ വകഞ്ഞ് മാറ്റിയ നക്ഷത്രങ്ങളുടെ നറുനിലാവ്! കാട്ടാറുകളിൽ പതഞ്ഞൊഴുകുന്ന തെളിനീർ പ്രവാഹം! വർണച്ചിറകുകൾ വിടർത്തി പറന്നുയരുന്ന ചിത്രശലഭങ്ങൾ! ഈ പ്രകൃതി സൗന്ദര്യങ്ങളിലേക്ക് ഇഴുകിച്ചേർന്ന്, ഇനി ഈ നാടിന്റെ തണൽ വൃക്ഷമായി Zest പച്ചപ്പണിഞ്ഞ് നിൽക്കും.

നാട് വളരാൻ നാടിനൊപ്പം